Babaé mı

Zazaki - Kırmancki | XIDIR | Eylül 21, 2009 at 15:46

Babaé mı,

Babaé mı,
Öyro tam phonc serriyo to ma ra briyay-ya şiyay
héni béwaxt…
Axx babaé mı, dırbetia to mı vérra néşiye,
nésona ki…
Rocé nébi ke,xo vérra bıkéri…
No, mı ré biyo derdo gran…

Veré çımané ma de qemisé to bi
Ma héfé to négırot babaé mı…
Axx babaé mı,
Hegaé ma béwayiré,
Çeperré ma kuli berdé vésné..
Babaé mı,
bané ma gıné pıro
dar u beré ma biyo husk..
Ma emegé to ré wayirine nékerde babaé mı,
Wayir né véciayme babaé mı.
Gumané mı,
Sodıra mal u mılké to ré ki wayir névécinime.
Ma ra to ré xér çino
Namé to ré,cédé to ré,pirbabé to ré…
Sebeno! Oncia urce peyser bé ,to wayir véci…

Babaé mı,
Çé ma zé xani bi
Pesew u peroc akerde bi çéberé ma
dost u dısmeni ré …
Nıka inamke kes ma sero
Çeber nékeno-ya babaé mı…

To zaf kutay ma véri baba!
Ya to bé, ya fınde ez ki béri lé to,
Ez daa zéde néşkino bonci
ni derdi ni qeremeti…

Nustoğ: Mazlum YILDIZ

————————————————-

bınnoti
öyro: ewro, na roce. (Zazakiyé Xozati de,huréndiya vengé -ew- de –öy- vacino.Mesela hewn=höyn, hewri=höyri, newe=nöyi, khewe=khöyi…)
sodıra:méşti,sorra
qeremet:ejat(eziyet),stam
qemis biyayis:Na noğde/çhekuye Tırki ra yena:kıymak,canına kıymak

Tags:

  • Benzer YAZILAR

    • YORUM YAP