ZON U VATENE

HawarTornecengi · Dost Kayıt: 31 Aralık 2006 Mesajlar: 28

Reklamlarımız Destekcilerimiz

ZON U VATENE

Hawar Tornêcengi

Na dina de mordem motazê jüviniyo, coka têlewe de ciranên keno u weşino. Çiyo ke têlewe de weşiyerê en jêde lazımo, o ki zono/zıwano. Dina de ison 've nusten u vatene alaqadarê juvini beno. Mordem; wastena xo, haskerdena xo, fıkrê xo, eve nusten u vatene diyaloğê xo ju zono de wertağ de ano'ra zon.

Qesey, çekuy, ifadey, kılami, lawıki, sanıki, kuratey meseli eve zoni sonê resenê hurêndia xo. Mordem; weşiya xode çiyo ke wazeno bıreso cı, ya ki xo-destfiyo, ancax eve lenger u pırdê zonê xo reseno cı. Na mane de zon; hetê XIZIRİ ra marê haleta de zaf-zaf rındeka. Şikime vajime ke; ZONÊ MA, -Zazaki/Kırmancki/Dımılki- çıtur name beno va bıbo, hetê ma u piyê mara, hetê ded u derezunê mara, hetê der u ciranunê mara u hetê sarrê dormê mara jü haleta de zaf hewla, ama resta ma. Ma ki na halete roza teng u hiraiye de rınd-xırav arda na rozenu gereke bıresnime az u uzê xo.

Siyaset kilitê zoni yo. Zon, eve siyaset raver sono. Coka siyaseto ğelet besekeno zoni werte ra bıdaro we. Nêtekim taê zoni eve siyaset wertê ra dariyê we. Mıleto ke bêhard u bêwelato, kultur u zonê xo dayma peyser mendo. Mordemi ke xeleşiyena xo sero sarê xo dezna, politika xo ke eve na usıl nêro, o waxt zon u zagoni ki raver sono.

Çıxaşi ke zon raver şi, honde ki edebiyat xo vurneno, xo keno newe. Zon gıredaiyê hardê welatê xuyo. Jê qomi, zon ke welat u hardê xora ke qılayiya ra, hal tey nêmaneno, xo bese nêkeno era-rast kero. Gereke welatê xode, bazarê xode mordem bêro têlewe, hêrnayisê xo suka xode bıkero ke, sunıke u weşiye şên bo. Mordemo famker, mordemo roştber u newdar gereke zonê xode bınusno, derd u kederê welatê xo, zonê xode biyaro’ra zon ke, mıletê xo ey fam bıkero u xêra de hewle i mordemi ra bivêno.

Zon, jê sola nuniyo. Sole ke mebo, thamê nuni saê ke çino. Coka neyrê vanê; nuno bêsole. Miraz ke kerd zerê miri, mir hekeino, perpelino we, eke ame werte thamê xo beno wes. Zono ke ame nustene, deyrê merdene çina.
Zon, reng u vengê qomiyo. Coka Zon; mirazê zagoniyo. Eke o zonde qeseykerd, vengê qomiyo xoser vejino, kamiya xo beli bena. Wertê hazar rengu de renê i qomi eve zon u kulturê i qomi bereqino. Her qom eve zonê xo esto. Zon u kulturi rê ke çı lazımo, gıraniye dave ser, sıfte o çi ardo werte. Coka dina-homete de yê her qomi radon u televizyonê xo her çi ra ravêr sono. Eve radon u televziyon mıletê xo rew beno haydar u fıkrê xo keno ju.

Mordemi ke hurmet nêda zon u kulturê xo, pi-khalıkê xorê ki hurmet u haskerdisê xo nêbeno. Mordemo ke reça pi-khalikê xora vejiya, wele bena’ra reça dey ser, o mordem hometa pi-khalikê xora kuno düri, kılmek ra; beno vindi sono.

Vêneme ke, zonê ma zaf tengiye onta. Hondayê serru bınê bandıra zihniyetê yasaxkerdene de mendo. Çı hewl ke, na zon u kultur vindi nêbiyo, amo na roze.
Çı hêf ke, nao na zon u zagono rındek ma dest ra vejino, jê theyrê bêperri gıneno waro.

Eke hêniyo, ma gerek zonê xorê wayir bıvejime, qedr u qimet cıdime. Hama naê ki bızonime ke, zonê xorê wayir vejiyene; qeseykerdene, wenden u nustene ra vêrena ra.
Ni hêremêna çi ke nêamey hurêndi, o zon rew-herey beno vindi.
Wastena ma awa ke, bêrê pêro-pia zonê xo bınuşnime u bıwanime, Radyo u Televizyonê xo, zonê xode bıhesnime u bıvênime.
Na rivat ra, weşiya ma pêroyine na rozşênê Newroji de rındek u şên bo!

Frankfurt, 21.03.2007
------------------------------------
Çıme/Kaynak: Dersim Post
(Avrupa Dersim Dernekleri Federasyonu yayın organı)
Sayı: 1, Mart 2007